Drejtori i Gazetës Online Reporteri.net, Bekim Kabashi, konsideron se Qeveria e Kosovës me çdo kusht po mundohet t’ia hedh fajin komunave për rritjen e vlerës së tatimit në pronë.

Kabashi tha se anipse komunat ka mundësi të japin komente lidhur me vlerën e tatimit, vendimi final i takon Ministrisë së Financave, e jo komunave.

“Problemi aktual është te Qeveria se po mundohen me çdo kusht me e bartë fajësinë te dikush tjetër, dhe për ma keq te dikush që nuk është fajtor. Është e vërtetë që komunat kanë mujt të bëjnë komente, po puna ekskluzive i ngarkohet Ministrisë së Financave. Ajo e ka përgjegjësinë kryesore me e caktu vlerën e pronave. Mundet komunat me bo komente, sic kanë bo disa komuna, por Ministria prapë e ka të drejtën ekskluzive mos me i marrë parasysh komentet e komunave nëse e vlerëson që ato nuk janë të drejta, siç nuk i kanë marrë”, tha ai në ATV.

Tutje, Kabashi tha se ky veprim i fundit i Qeverisë ishte i padrejtë e tendencioz.

“Qeveria në rastin më të mirë, në këtë rast sot, nuk është dashtë me dal me ia hudh përgjegjësinë komunave sepse është e padrejtë, është tendencioze”.

Ky reagim i Kabashit erdhi pas deklaratës së sotme të Ministrisë së Financave për rritjen e vlerës së tatimit në pronë. Kjo e fundit tha se shkallën e tatimit e përcaktojnë vetë komunat.

“MFPT, bazuar në Ligjin për Tatim në Pronë, obligohet që në baza të rregullta të bëjë vlerësimin e pronave të paluajtshme, ndërsa shkallën e tatimit e përcaktojnë vetë komunat”, thuhet mes tjerash në njoftim.

Tutje në reagimin e bërë nga kjo ministri thuhet se “Departamenti i Tatimit në Pronë ka bashkëpunuar ngushtë me komunat për të përcaktuar çmimin për m2 për objekte dhe toka”. /Reporteri.net/.