Kancelarja, Angela Merkel mbërrin në Shqipëri

Kanacelarja gjermane Angela Merkel ka mbërritur në Shqipëri. Bashkë me delegacionin që e shoqëron, avioni i kancelares është ulur pak minuta më parë në Aeroportin Ndërkombëtar “Nënë Tereza”.


Në orën 10.20, sipas axhendës së njoftuar nga Kryeministria, Merkel do të takohet në Pallatin e Brigadave me kreun e qeverisë Edi Rama. Në orën 14.35, do të ketë një konferencë për shtyp mes Kryeministrit Rama dhe Kancelares Merkel në Tirana Business Park.

Liderja “de facto” e Europës është pritur në aeroport nga ministrja e Jashtme Olta Xhaçka.

Në lidhje me vizitën e kancelares, Policia e Shtetit ka bërë me dije planin e masave të sigurisë, ku njofton qytetarët për bllokimin e disa akseve rrugore dhe devijimin e lëvizjes së automjeteve.

Plani i masave të Policisë:

Në kuadër të masave për sigurimin e rendit dhe sigurisë publike para, gjatë dhe pas zhvillimit të takimit të Kancelares së Republikës Federale të Gjermanisë dhe Kryeministrave të Ballkanit Perëndimor në vendin tonë, më datë 14.09.2021, në Tiranë, në disa segmente rrugore, për motive sigurie, do të ketë bllokime dhe devijime të lëvizjes së automjeteve, konkretisht në Rinas-Unaza e Re, Sauk, Rruga e Elbasanit deri tek Pallati i Brigadave.

Policia e Shtetit kërkon mirëkuptimin e drejtuesve të automjeteve që të shmangin lëvizjen në këto segmente rrugore, me qëllim moskrijimin e mbingarkesës në trafik nga ora 09:00 deri në orën 13:00 të datës 14 shtator, si dhe të përdorin rrugë alternative për të shkuar në destinacionet e tyre.

Shërbimet e Policisë do jenë prezente në të gjitha akset rrugore hyrëse dhe dalëse të qytetit të Tiranës dhe në rrugët  e tjera në brendësi të kryeqytetit, me qëllim marrjen e masave për të siguruar dhe rregulluar trafikun në rrugët alternative, si dhe për t’iu ardhur në ndihmë përdoruesve të rrugës që do kenë nevojë.