Zëdhënësi i BE-së, Peter Stano ka thënë Kosova dhe Serbia janë të obliguar kontraktualisht të zbatojnë Marrëveshjen e Ohrit dhe Aneksin, dhe ka bërë të qartë se nëse nuk e bëjnë këtë, atëherë  kjo përkthehet në braktisje të rrugës  drejt Bashkimit Evropian.

Stano nënvizoi se “tashmë do të jetë në rrezik reputacioni dhe besimi ndërkombëtar në Kosovë dhe Serbi, andaj ata duhet të tregohen si partnerë të besueshëm për BE-në dhe prandaj është e nevojshme të zbatohet ajo që kanë premtuar”, transmeton gazeta online Reporteri.net.

Stano theksoi se javën e kaluar  se Përfaqësuesi i Lartë i BE-së, Josep Borrell i ka informuar liderët e BE-së për bisedimet në Ohër dhe ka thënë se Kosova dhe Serbia tani duhet ta vënë në praktikë atë për të cilën kanë arritur marrëveshje.

Dhe, siç theksoi ai, Borell edhe një herë e bëri të qartë se çdo spekulim për nënshkrimin apo vlefshmërinë e marrëveshjes së Ohrit është i pavlefshëm dhe gjithçka që ka ndodhur në dialogun e deritanishëm ka dëshmuar se rëndësia e marrëveshjes matet me shkallën e zbatimit të saj, jo me nënshkrim”.

Përfaqësuesi i lartë i BE-së, theksoi Stano, “e ka bërë shumë të qartë se marrëveshja e Ohrit është finalizuar, e njëjta duhet të zbatohet dhe se nuk ka vend për të zgjedhur atë që kërkohet dhe çfarë jo”.

Ai tha se “të dyja palët e dinë shumë mirë se çfarë duhet të bien dakord dhe zbatojnë sepse e kanë pranuar shprehimisht në marrëveshjen e Ohrit dhe BE-ja sigurisht që do t’i ndihmojë, por nuk është BE ajo që do të propozojë zgjidhje specifike, ndërsa detyrimet janë ndërmarrë qartë”.

“Dhe të dyja palët e dinë”, shtoi ai, “që do të ketë pasoja shumë të pafavorshme nëse kjo nuk bëhet, sepse është pjesë e marrëveshjes, ashtu siç do të ketë pasoja shumë të favorshme nëse marrëveshja nuk zbatohet”.

Stano u përgjigj se pala kosovare e njeh shumë mirë mënyrën e arritjes së marrëveshjes, zgjidhje për Asociacionin e Komunave me shumicë serbe.

Dhe, siç saktësoi ai, “BE-ja e ka paraqitur plotësisht qartë në Marrëveshjen e Ohrit dhe në aneks dhe janë dy palët ato që duhet ta zbatojnë. BE-ja ka ofruar një platformë për dialog dhe gjithçka duhet të zbatohet në atë kuadër”, ka thënë ai.

Më 18 mars, Kosova dhe Serbia u pajtuan në Ohër mbi zbatimin e një plani evropian për normalizimin e marrëdhënieve ndërmjet tyre.

E mirëpritur në shkallë të gjerë nga diplomacia perëndimore, marrëveshja ka nxitur reagime në të dyja vendet.

Në Kosovë, shqetësimet lidhen kryesisht me zotimin e saj që t’i jap një shkallë më të gjerë të “vetë-menaxhimit” komunitetit serb dhe të zbatojë marrëveshjen për themelimin e Asociacionit të komunave me shumicë serbe.

Kryeministri i Kosovës, Albin Kurti gjatë javës që shkoi  ka pranuar se Asociacioni i komunave me shumicë serbe ekziston në marrëveshjen e dakorduar më 18 mars.

Kurti tha se aleatët ndërkombëtarë ia kanë bërë të qartë se detyrimet ndërkombëtare që janë arritur në emër të shtetit tonë nuk ndryshojnë, edhe kur qeveritë ndryshojnë. /Reporteri.net/