Gazeta Online “Reporteri.net” ka mësuar se Partia Demokratike e Kosovës ka dhënë sinjale pozitive për votimin e Projektligjit për Rimëkëmbje Ekonomike.

PDK dhe Lidhja Demokratike e Kosovës, kanë përafruar qëndrimet e tyre lidhur me Pakon Ekonomike, shkruan Reporteri.net.

Gazeta merr vesh se LDK-ja është pajtuar që të përfshihen në Pako edhe propozimet e PDK-së dhe Projektligji për Rimëkëmbje shumë shpejt pritet të kalojë në lexim të dytë në Kuvend.

Ndryshe, kreu i LDK-së, Isa Mustafa, ka mbledhur Grupin Parlamentar në një mbledhje urgjente.

Siç merr vesh Reporteri, në mbledhje pritet të diskutohet lidhur me pozitën e presidentit si dhe për Pakon për Rimëkëmbje Ekonomike.

Qeveria e cila udhëhiqet nga LDK-ja, që nga marrja e pushtetit nuk ka arritur që të sigurojë votat e nevojshme për kalimin e Rimëkëmbjes Ekonomike.

Kjo mbledhje e LDK-së vjen një ditë pas rezultatit në zgjedhjet në Podujevë, ku kandidati i kësaj partie për kryetar të komunës, Nexhmi Rudari, është radhitur i dyti, duke e humbur për herë të parë pushtetin e Lidhjes Demokratike në këtë komunë. /Reporteri.net