Serbët protestojnë kundër festivalit ku po marrin pjesë kosovarët

Dhjetëra serbë kanë protestuar në kohën kur ka nisur festivali “Miredita Dobar Dan”.


Ata me me këngë patriotike serbe kanë penguar festivalin ku po paraqitet kultura kosovare, raporton gazetari i Reporteri.net që ndodhet në Beograd.

Për të mbajtur situatën nën kontroll kanë dalë një numër i shtuar i policisë.

Në këtë festival po marrin pjesë një numër i madh i artistëve dhe gazetarëve nga Kosova me synim të bashkohen komunitetet shoqërore e kulturore të Kosovës dhe Serbisë dhe të krijohet një traditë bashkëpunimi, që do të kontribuojë në arritjen e një normalizimi të qëndrueshëm të marrëdhënieve mes dy shteteve.

Më poshtë gjeni disa foto nga protesta:

Artistët dhe gazetarët sot u kontrolluan imtësisht në pikën kufitare në Merdare nga policia serbe për të parë nëse posedojnë flamuj apo diçka tjetër që simbolizon shtetin e Kosovës.

Festivali i kulturës së Kosovës “Mirëdita, Dobar dan!”, është mbajtur nën tensione edhe gjatë viteve të kaluara.

Vitin e kaluar, rreth dy orë para se të niste festivali, në afërsi të Qendrës për dekontaminimin kulturor, ishte mbajtur protestë e organizuar nga Partia Radikale Serbe, e të dënuarit të Hagës, Vojisllav Sheshel.

Ky festival organizohet nga Integra (Kosovë), Nisma e të Rinjëve për të Drejtat e Njeriut (Serbi), dhe Iniciativa Qytetare (Serbi), me mbështetjen e Fondacionit Kosovar për Shoqëri të Hapur (KFOS), Fondacioni për Shoqëri të Hapur në Serbi, Rockefeller Brothers Fund (RBF), Ministria e Kulturës, Rinisë dhe Sportit e Republikës së Kosovës.

Festivali ka filluar në vitin 2014 dhe qëllimi i tij ishte të prezantojë aktualitetin kulturor të Kosovës në Beograd në mënyrë që të dyja shoqëritë të përafrohen përmes kulturës dhe artit.

/Reporteri.net/.