Hapet pjesërisht kufiri Shqipëri – Greqi

Pas disa muajsh që ka qëndruar e mbyllur për kalimin e qytetarëve, pika kufitare e Kapshticës do të hapet pjesërisht. Autoritetet greke kanë njoftuar palën shqiptare se duke filluar nga dita e sotme, deri në datën 31.05.2021, nga ora 08:00-16:00, do të lejohet hyrja e shtetasve shqiptarë në drejtim të Greqisë, të cilët mbajnë statusin e punëtorit sezonal.


Por për të kaluar në këtë pikë kufitare, të gjithë duhet t’i nënshtrohen një testi të shpejtë kundër Covid që do të bëhet nga autoritetet në kufi.

Ndërkohë mësohet se kuota ditore e qytetarëve që do të kalojnë është 400 persona, të cilët duhet të plotësojnë formularin e regjistrimit PLF në adresën http://www.travel.gov.gr dhe pasi të kenë marrë konfirmimin, mund të lejohen që të hyjnë në tokën greke.

Asnjë kategori tjetër nuk do të lejohet të hyjë drejt Greqisë, përfshirë shërbim taxi, mjete të tonazhit të rëndë apo shtetas me leje qëndrimi, shtetas grekë apo evropianë të tjerë.

Ndërsa dalja nga Greqia dhe hyrja drejt vendit tonë, do të jetë e lejuar nga ora 06:00 deri në orën 22:00, për të gjithë shtetasit dhe kategoritë e mjeteve./tvklan.al