Presidenti serb, Aleksandar Vuçiq në një konferencë për media tha se dita e sotme është shumë e vështirë për Serbinë, duke aluduar në aksionin e  policisë së Kosovës në Veri.

Vuçiq u shpreh se pas aksionit të sotëm asgjë më nuk do të jetë e njëjtë, as me shqiptarët dhe as me të gjithë ata që proklamuan se kjo ishte një luftë kundër krimit dhe korrupsionit, transmeton Reporteri.net

I pyetur për deklaratat e tij se Serbia është e gatshme të intervenoj ushtarakisht në Kosovë në rast se kërkohet, Vuçiq u shpreh se ai asnjëherë nuk e ka thënë një gjë të tillë.

Ndërkohë që kur u pyet nga një gazetar se a e di që intervenimi në Kosovë sipas marrëveshjes së Kumanovës do të thotë luftë me NATO-n, Vuçiq u përgjigj se nuk ka përmendur asnjëherë intervenimin ushtarak në Kosovë, por ka thënë se Serbia do të mbrojë shtetasit e saj këtu.

“Kam thënë se Serbia është e gatshme të mbrojë popullin e saj, është e gatshme dhe do të jetë gjithmonë ta mbrojë territorin e saj. Me vite më keni akuzuar për tradhti dhe që nuk po u ndihmoj serbëve, kurse tani po më akuzoni se po luftoj. Përgjigjuni për çka jam fajtor. Se po luftoj ose po qëndroj. Nuk kam përmendur asnjë intervenim, këtë e keni bërë ju. Unë vetëm kam thënë që do ta mbroj popullin tim. Unë nuk jam njeri aq i papërgjegjshëm që popullin tim ta vë në pozitë të vështirë, por nuk jam as aq i pakujdesshëm që të lejoj që populli im të keqtrajtohet”, është shprehur ai./Reporteri.net