Kreu i LDK-së, Isa Mustafa ka thënë se tri interpelancat që kryeministri Hoti sot ka në Kuvendin e Kosovës sot, në fakt janë tri mësymje kundër tij.

Mustafa ka thënë se dy nga këto interpelanca janë kundër marrëveshjes dhe bashkëpunimit me SHBA-të dhe një, pse kryeministri është shprehur se duhet të zbatohet Aktgjykimi i Gjykatës Kushtetuese për respektimin e Ligjit të miratuar me 2/3 e deputetëve, i cili ka krijuar detyrime ndërkombëtare të Kosovës.

Sipas Mustafës, ata që e vlerësojnë miqësinë dhe partneritetin me SHBA-të, sot janë me Kryeministrin, si dhe ata që ndajnë bindjen se Kosova duhet t’u përmbahet marrëveshjeve ndërkombëtare dhe Ligjit, si dhe partneritetit me BE-në, sot duhet të jenë me kryeministrin.

Reagimi i plotë i Mustafës:

Të nderuar miq,
Sot, tri interpelanca njëpasnjë në Kuvendin e Kosovës. Tri mësymje kundër Kryeministrit Hoti.
Dy, kundër marrëveshjes dhe bashkëpunimit me SHBA-të dhe një, pse është shprehur se duhet të zbatohet Aktgjykimi i Gjykatës Kushtetuese për respektimin e Ligjit të miratuar me 2/3 e deputetëve, i cili ka krijuar detyrime ndërkombëtare të Kosovës.
Ata që e vlerësojnë miqësinë dhe partneritetin me SHBA-të, sot janë me Kryeministrin. Ata që ndajnë bindjen se Kosova duhet tu përmbahet marrëveshjeve ndërkombëtare dhe Ligjit, si dhe partneritetit me BE-në, sot mbështesin sjelljen parimore dhe të përgjegjshme të Kryeministrit dhe Qeverisë Hoti! IM