Mëngjesi i së dielës është i qetë në veri të vendit, por rrugët vazhdojnë të jenë të bllokuara.

Kështu i tha Radios Evropa e Lirë, drejtori i Policisë së Kosovës për rajonin e Mitrovicës së Veriut, Besim Hoti.

Për situatë të qetë raportojnë edhe gazetarët e REL-it nga terreni.

KFOR-i dhe EULEX-i janë duke e monitoruar situatën. Ndërsa pak njerëz shihen aktualisht në barrikadën në Rudarë të Zveçanit.

Gjatë ditës së shtunë (dje) u raportua për barrikada në disa komuna veriore, shkëmbim zjarresh mes bandave kriminale serbe e policëve të Kosovës si dhe shpërthime të tjera e sulme edhe ndaj gazetarëve që po raportonin nga vendi i ngjarjes.

Kryengritjet e para ditën e shtunë filluan me grumbullimin e qytetarëve serbë në Rudarë, në afërsi të Zveçanit, të cilët kundërshtonin arrestimin e Dejan Pantiq, pjesëtar i policisë serbe. Ky i fundit u arrestua pasi dyshohet për sulm ndaj qendrave të KKZ’së në Mitrovicë të Veriut, shkruan Gazeta Online Reporteri.net.

Edhe pasi u kumtua lajmi për shtyrje të zgjedhjeve të jashtëzakonshme në Veri, qytetarët serbë nuk u ndalën. Ata filluan me bllokim të rrugëve përmes ngritjes së barrikadave.

Policia e Kosovës bëri të ditur se pjesëtarë të komunitetit serbë kanë vendosur automjete dhe mjete të rënda në rrugë nacionale të komunave të Leposaviçit, Zveçanit dhe Zubin Potokut.

Kjo e detyroi Policinë e Kosovës që t’i mbyllë për qarkullim pikat kufitare në Jarinjë dhe Bërnjak.

U raportua se serbët po përdornin kamionë të cilët i kishin pranuar si donacion nga BE’ja si barrikada për bllokim rrugësh.

Policia e Kosovës njoftoi se njësitet policore, në afërsi të Ujmanit, në vetëmbrojtje janë detyruar t’iu kundërpërgjigjen me armë zjarri disa personave/grupeve kriminale, të cilat janë zmbrapsur dhe larguar në drejtim të panjohur.

Po ashtu bazuar në informacionet e siguruara nga njësitet policore në terren, të shtëna me armë zjarri u dëgjuan edhe në disa lokacione të tjera.

Ekipe të gazetarëve e gjetën vetën në rrezik, teksa po raportonin për situatën në Veri. Ata u sulmuan me shok-bomba nga persona të identifikuar. Nuk pati të lënduar nga këto shpërthime. /Reporteri.net/.