Plani serb për ta inskenuar “katastrofën humanitare”në veri po vazhdon me ngulm nga Beogradi, ekskluzivisht nga kreu i shtetit, Aleksandar Vuçiq.

“Është hedhur helm në Gazivodë, dhe mos pini ujë nga ujësjellësi”, është urdhri tjetër që vjen nga strukturat e terrenit në komunat e veriut.

Sipas RTK-së përveç kryetarëve të komunave, shumë aktiv në këtë drejtim, është edhe Zoran Millojeviq i njohur si “Zelja”, i cili, kryesisht, vepron me presion dhe me dhunë, sa herë ka nevojë Beogradi zyrtar.

“Zelja gjithmonë është aty ku urdhrat e Beogradit hasin në vështirësi për t’u zbatuar nga qytetarët dhe rendi i dytë i strukturave. Kështu ka ndodhur vazhdimisht edhe në kohën e zgjedhjeve apo mosmarrëveshjeve brenda Listës Srpska”, raporton RTK.

“Për ta zbatuar këtë plan po flitet se janë përfshirë edhe serbët prorusë. ‘Zelja’ka kontaktuar edhe me Momçilo Arllovin, një serb që ka qenë bashkëpunëtor i shërbimeve serbe të inteligjencës, dhe shumë i afërt me Dejan Damnjanoviqin, i cili është shumë i lidhur me rusët Leonid Savin dhe Aleksandar Duginin, ideologun e Putinit”, shkruan RTK.

Të martën mbrëma Radosh Petroviq, që deklarohet si përfaqësues i Veriut deklaroi  se kriza është diçka reale.

Kujtojmë se kryeministri Haradinaj tha të martën se serbët kanë skenar që produktet të bartën nëpër shtëpi dhe objekte tjera, dhe kanë prova të këtij skenari.

Haradinaj ka deklaruar se target kohë e kanë të enjten për me aktivizuar këtë skenar.