Përfaqësuesi i lartë i BE-së për Punë të Jashtme dhe Siguri, Josep Borrell e ka nominuar edhe zyrtarisht ndërmjetësin evropian për dialogun Kosovë-Serbi, Miroslav Lajçak për pozitën e ambasadorit të BE-së në Zvicër, transmeton gazeta online Reporteri.net.

Kjo është bërë e ditur përmes një njoftimi të zyrës së Borrell.

“Miroslav Lajçak është nominuar si ambasador i BE-së në Zvicër. Ai aktualisht është duke shërbyer si Përfaqësues Special i Bashkimit Evropian për Dialogun Beograd-Prishtinë dhe çështje të tjera rajonale të Ballkanit Perëndimor. Ai ka shërbyer më parë si Ministër i Punëve të Jashtme dhe Evropiane të Sllovakisë”, thuhet ndër të tjera në njoftim.

Ndërkaq Orav Aivo është nominuar si Shef i Zyrës së BE-së në Kosovë. Ai aktualisht shërben si Përfaqësues i Përhershëm i Estonisë në BE. Orav ka shërbyer më parë si ambasador i BE-së në Mal të Zi.

Procesi i emërimit të të nominuarve do të zyrtarizohet pas marrjes së miratimit zyrtar nga vendet pritëse përkatëse.

Ende nuk dihet se kush do ta pasojë Lajçakun në pozitën e ndërmjetësuesit në dialogun Kosovë-Serbi.

Lajçaku shpesh është akuzuar për qëndrim jo neutral dhe qasje të pabarabartë në dialog. Vetë kryeministri Albin Kurti e akuzoi ndërmjetësin evropian të dialogut për normalizimin e raporteve me Serbinë, se është “pozicionuar” kundër Kosovës. /Reporteri.net/

Lajçaku e ka të shkruar që të dështojë