Njëri prej pengjeve që mendohet se ishte marrë nga Hamasi më 7 tetor, është shpallur i vdekur pasi trupi i tij është gjetur në Izrael, kanë njoftuar Forcat Mbrojtëse të Izraelit.
IDF-ja ka njoftuar se mbetjet e Elyakim Libmanit janë identifikuar pas një procesi të gjatë të hetimit, raporton BBC.
Libman po punonte si roje në festivalin Nova në kohën e sulmit nga militantët e Hamasit.
Familja e tij ka marrë një njoftim nga shteti izraelit se Libman është vrarë në masakrën e 7 tetorit, përcjell gazeta online Reporteri.net.
Mediat izraelite kanë raportuar se mbetjet e tij ishin varrosur gabimisht bashkë me një viktimë tjetër të festivalit.
Rreth 1 mijë e 200 persona u vranë në sulmin e 7 tetorit. Më shumë se 360 prej tyre u vranë në festival.
Ndërkaq, 130 pengje po mbahen nga Hamasi. 34 prej tyre besohet se kanë vdekur.
Që nga fillimi i luftës mes Izraelit dhe Hamasit, në territorin palestinez të Gazës janë vrarë më shumë se 34 mijë persona, shumica e tyre gra dhe fëmijë.