Autoriteti i Aviacionit Civil sqaron alarmin për dyshimet e një sulmi me bombë që u raportua sot në Aeroportin e Rinasit.

AAC sqaron se alarmi i sigurisë i ndezur sot ka qenë një test i fshehtë sigurie me qëllim testimin e sistemit të sigurisë dhe vlerësimin e reagimit të operatorit aeroportual në rastin e një rreziku potencial nga akte të ndërhyrjes së paligjshme.

Reagimi i AAC:

Autoriteti i Aviacionit Civil kreu ditën e sotme në datë 30 Shtator 2020, një test të fshehtë të sigurisë në Aeroportin Ndërkombëtar “Nënë Tereza”, me qëllim testimin e sistemit të sigurisë dhe vlerësimin e reagimit të operatorit aeroportual në rastin e një rreziku potencial nga akte të ndërhyrjes së paligjshme.

Me qëllim sqarimin e opinionit publik, Autoriteti i Aviacionit Civil ju informon se: këto lloj aktivitetesh monitoruese janë pjesë e metodologjisë për të vlerësuar performancën e operatorit aeroportual në përpjekje për të rritur sigurinë në aviacionin civil.

Autoriteti i Aviacionit Civil falenderon për bashkëpunimin të gjitha subjektet pjesëmarrëse në këtë aktivitet të rëndësishëm për sigurinë e aviacionit civil, në Aeroportin Ndërkombëtar të Rinasit.